Lamento por diego

La cabeça de Muño Salido tornóla en su lugar
E la de Diego Gonçález su fijo el mayor fue a tomar,
Mesando sus cabellos e las barbas de su faz,
¡Viejo so mesquino para estas bodas bofordare!

Fijo Diego Gonçález, a vos quería yo mase
Fazialo con derecho ca vos naçiérades ante.
Grant bien vos quería el conde ca érades su mayor alcaide
Tan bien tovistes la su seña en el vado de Cascajare,
A guisa de mucho ardido, muy onrada la sacastes.

Fezistes, fijo, en ese día un esfuerzo muy grande:
Alçaste la seña, metístesla en la mayor haze,
Fue tres vezes abaxada e tres vezes la alçastes
E matastes con ella dos reyes e un alcaide.

Por esto en arriba los moros oviéronse de arrancare,
Metíense por las tiendas que non avían vagare,
E vós yendo en ese día en pos ellos en alcançe
Fue de vós muy bien servido el conde Garci Fernández.
¡Bueno fuera Ruy Velázquez si ese día finase!

Trasnocharon los moros, fuéronse para Gormaze.
Diovos ese día el conde a Caraço por heredat,
La media poblada e la media por poblar;
Desque vós moristes, fijo, lo poblado se despoblaráve.”

Besó la cabeça e tornola a su lugar.
Cada uno como nasçió así las iva tomare.


1 Star2 Stars3 Stars4 Stars5 Stars (1 votes, average: 5.00 out of 5)

Poema Lamento por diego - Anónimo